Kodi I Da Vinçit nga Dan Brown

Teuta Shabani Towler

Roman shumë interesant dhe tërheqës. Më ka ngjallur imagjinatën dhe tani kudo që shoh piktura të Da Vinçit i shikoj me një kuriozitet të veçantë.  

 Gjeja që më ka pëlqyer më së shumti ishte ndërtimi i kodit në mënyrë aq sekrete nga Shefi i muzeut Lavore në Francë, i cili është bazuar në kode të lashta të Da Vinçit.

Ngjarja fillon me gjetjen e trupit të tij të vrarë në muze dhe të pozicionuar me shenja të pikturës pranë Mona Lizës. Ai ka qenë kryetarë i grupit sekret Priori Sion që ka ekzistuar që nga koha e Krishtit dhe kanë arritur të fshehin faktet me mbi 1000 vjet. Fakte ato që do të ishin në kundërshtim me mënyrën se si është shkruar bibla dhe si praktikohet feja katolike nga Vatikani. Ai edhe në momentin e vdekjes e ka mbrojtur thesarin për gjetjen e Holy Grail, sa që vetëm mbesës së tij i ka besuar t’ia lë pas vdekjes së tij skretin. Mbesa e tij Sofi Neveu (Police Françeze e Kriptologjisë) dhe Robert Langdon (ekspert nga universiteti i Harvardit) i bien në fije dy kodeve të para në vendin e ngjarjes.

 Sofi dhe Roberti ballafaqohen me policinë franceze pasi që Robetri është i dyshuar i parë për vrasjen e shefit të muzeut.

 Nuk kam mundur ta lëshoj këtë libër nga duar për dy ditë rresht derisa e kam përfunduar, sepse aksionet e Sofit dhe Robertit për të gjetur kodet vazhdonin rregullisht kurse në anën tjetër hetimet e policisë për ndjekjen dhe kapjen e tyre si dhe të personave tjerë të implikuar në vrasje të katër anëtarëve të Priori Sion.

 Fundi ka qenë i kënaqshëm për mua pasi që Roberti ka zbuluar Holly Grail dhe e ka mbrojtur atë që të mos bie në duart e njerëzve të këqij të cilët për fuçi dhe para kanë vrarë njerëz në emër të zotit dhe fesë.

Gjithashtu fund i suksesshëm edhe për Sofin sepse e gjen gjyshen dhe vëllanë e saj për të cilët gjatë gjithë jetës ka menduar se janë të vdekur. Si dhe në fund fillon lidhja romantike në mes të Sofit dhe Robertit.  

Libri ia vlen të lexohet sepse përveç që është edukues është edhe argëtues. Andaj mos hezitoni ta lexoni.

 

Total Horror nga Xhemajl Sadriu   

Teuta Shabani Towler

Romani “Total Horror” i autorit Xhemaj Sadriut është njëmend horror. Ky ka qenë romani i parë më i tmerrshëm që kam lexuar ndonjëherë. Romani është i pasur me përshkrimet e detaje të vendeve, dukjeve të djajve dhe veprimet e tyre. Është për t’u çmuar ndërtimi dhe zhvillimi i personazheve,  sidomos i atij të Adrian Durashametit – Formë Hallka dhe të Shartek Djallit - Formë Thika. Kreativiteti dhe imagjinata e autorit në këtë roman është e kombinuar në mënyrën më profesionale artistike që mund të ketë shkruar ndonjë autor i ri Shqiptar por edhe i huaj.

 Ngjarja fillon me Adrianin i cili fillon të sheh djaj derisa shkonte me gjyshen e tij në një restorant tek Liqeni i Sovablenit. Adriani kishte përjetuar një tmerr kohë më parë në po atë rrethinë kur e dashura e tij Arta është vrarë dhe ngrënë nga djajtë. Adriani mundohet të mbrohet nga djajtë por në fillim nuk dinte dobësitë e tyre. Më vonë zbulon dobësitë e tyre dhe fillon të pajiset me atë lloj arme. Adriani fillon të lufton kundër djajve për të shpëtuar vetveten, njerëzit e tij të dashur e sidomos nënën, motrën Friden dhe dajën e tij Patrikun. Adriani përveç që ballafaqohet me djaj, ai ballafaqohet edhe me njerëzit përreth sepse mendojnë se është i çmendur. Për fat të keq, edhe njerëz të tjerë arrijnë të jen pikë sulmi për djajtë të cilët gradualisht fillojnë të besojnë teorisë së Adrianit.

Romani është shumë tërheqës për ta lexuar sepse vazhdimisht ka aksione e luftime në mes të djajve dhe Adrianit, e më vonë edhe të disa luftëtarë kundër djajve nga Afrika siç ishte Banguri dhe më në fund Buba.

Fundi për mua ka qenë zhgënjyes. Romani përfundon pa i sqaruar disa çështje, por unë shpresoj që autori i ka lënë këto zbrazëti me qëllim për të shkruar romanin  e dytë si vazhdimësi i të parit.  Shpresoj se veç është duke e shkruar dhe të botohet së shpejti, këtë duhet ta merr si obligim ndaj lexuesve të tij për të sqaruar gjërat nga romani i parë.  

Iu rekomandoj të gjithë atyre lexuesve që iu pëlqejnë gjërat e imagjinuara dhe larg realitetit që ta lexojnë sepse ia vlen koha që do ta kaloni me këtë roman.

  Për ata që jetojnë jashtë atdheut këtë libër mund ta porositni përmes internetit në web faqen  www.libri24.com/

  

Më Pas Heshtja nga Elvira Dones

Teuta Shabani Towler

Më pas heshtja, roman i shkruar me shumë kreativitet por tregimi fare interesant për mua. Nuk më  ka pëlqyer ndërtimi i personazhit kryesor dhe si është përshkruar jeta e saj. Gjatë gjithë kohës sa lexoja shpresoja se diçka interesant do të ndodhë por në fund ndodhë edhe një zhgënjim më i madh, vdekja e personazhit kryesor. E vetmja gjë ka qenë e mirë që ajo ka lënë pas një manuskript që botohet në roman pas vdekjes së saj. Më pas Heshtja, njëmend më ka lënë në heshtje sepse nuk kam pasur për çka të mendoj e as të analizoj pasi kam përfunduar së lexuari. Jam ndier e nervozuar për kohën që kam humbur me atë roman.

 

Tinguj Malli të  Merita Bajraktari McCormak

Teuta Shabani Towler

Libri Tinguj Malli është libri më i mirë poetik që kam lexuar për një kohë të gjatë. Këtë e dëshmon edhe fakti se ky libër fitoi cmimin Pena e Art, konkrus i Shoqatës së Shkrimtarëve Shqiptaro-Amerikan, në gusht të 2006.
Poezit e Merites jane plot emocione dhe jane disa poezi qe ende me sillen neper koke ne momente te ndryshme. Nganjherë më duket sikur Merita B.McCormak ka shkruar ndjenjat e mia. Ndoshta kjo është për faktin se ne të dyjat jetojmë larg vendlindjes dhe malli i shprehur në poezit e saj është i njejt me atë timin.

 

Libri Poetik i Fahredin Shehut

Teuta Shabani Towler

Pena e Fahredin Sheut është e artë. Ajo na solli emocionet dhe mendimet e autorit përmes metaforave të përdorura me mjaft shkathtësi.

Poezia që më ka pëlqyer më së shumti ishte “Argëtim me Lodra te Vjetra”. Ajo poezi më ka mbetur në kokë dhe shpesh e zë veten duke e recituar në heshtje. Sa herë ulem pranë kompjuterit të shkruaj në romanin tim, ajo poezi më sillet vërdallë në mendje dhe pa pritur, lind motivimi që të luaj me fjalën dhe argëtohem duke shkuar deri në orët e vona.

 

Për romanin e zhanrit policor “Vrasjet dhe makijazhet”të Teuta Shabani Towler  

Sali Bytyçi

Shfaqja e romani të zhanrit policor, në këtë kohë, e gjen fushën e hapur në Kosovën e pasluftës, në një shoqëri postkonfliktuoze, bartëse të traumave të llojllojshme, dhe ku bën ligjin një staf ndërkombëtar burokratik. Hyrja e Kosovës në një fazë të re krijon kushtet materiale që të gjejë shprehje edhe ky zhanër i palëvruar më parë. Jo njëherë hetuesit, por edhe lexuesi, në këto vrasje kërkojnë motive të llojllojshme, të cilat e largojnë nga autori i vërtetë i krimit deri te burgosja e të pafajshmëve (rasti i Besnikut në Pejë), pastaj hutimi pas rojeve të urës, të cilat çojnë hetimet në rrugë pa krye. Lexuesi në të shumtën e kohës është i tendosur, sepse dyshimet e tij shkojnë në kahe të ndryshme të motivit të këtyre vrasjeve: xhelozia, hakmarrja, motivi etnik etj. Autorja zgjedh atë që nuk e pret askush: vrasjet e motivuara nga sëmundja psikike. Me botimin e romanit “Vrasjet dhe makijazhi” lexuesi shqiptar ka në dorë romanin e parë të zhanrit policor, i cili mund të them lirisht se është një vepër e suksesshme e llojit të vet. Këtu autorja Teuta Shabani Towler i ka hyrë një pune të parrahur më parë në letërsinë shqipe, prandaj ajo edhe është gjendur para shumë sfidave. Tema e vrasjeve të pasqaruara në Kosovë është sa delikate, aq edhe e vështirë për t’u trajtuar. Gjithashtu, në trajtimin e kësaj teme rreziqet që i dalin para autorit janë të shumta.Shtrirja e ngjarjeve që thuren këtu, ngërthejnë në vete tërë Kosovën. Ato ndodhin në Pejë, në Prizren, në Mitrovicë, Skenderaj dhe, në fund, edhe në Prishtinë.Subjekti nga jashtë të lë përshtypjen se ka të bëjë me ngjarje të shkëputura, të palidhura në mes vete, ndërsa nga brenda ka një linjë që shkon përkrah atij që i kryen vrasjet dhe që përputhet me “filozofinë” e qenies patologjike, e cila kënaqet duke i dhunuar dhe duke i vrarë femrat. Pikërisht përsëritja dhe ngjashmëria e rasteve të shkëputura nga njëra-tjetri ndikojnë në krijimin e strukturës së romanit. Ndërkaq hetimin e ngjarjeve e vonon moseksperienca e policisë vendore si dhe ndërlikueshmëria e asaj ndërkombëtare. Autorja jo njëherë në roman merr qëndrim kritikues ndaj neglizhencës së policisë ndërkombëtare, sidomos ndaj asaj pjese që vjen nga Lindja dhe nga vendet e prapambetura, si India, Bangladeshi, Egjipti etj., por njëherësh edhe vë në pah angazhimin e policisë ndërkombëtare, që vjen nga Amerika apo nga vendet tjera perëndimore. Në shenjë të kritikave të saj është administrata e ndërlikuar e UNMIK-t, e cila në vend që t’i gjurmojë dhe t’i zbulojë krimet, vepron në drejtim të kundërt, duke i mbyllur ato pa i filluar ende. Një vend të kritikave të saj në roman ia lë edhe KFOR-t francez, që vepron në Mitrovicë dhe rreth saj. Vrasjet ndodhin në skenë, ndërsa vrasësi gjithnjë është në prapaskenë, në thellësi të ngjarjeve. Krimi është i drejtuar ndaj femrave të cilat punojnë në organizatat për të drejtat e femrave. Në roman del edhe dyfytyrësia e një pjese të gazetarisë, e cila për të mbijetuar në këto kushte të egra, arrin aq larg sa të bashkëpunojë me krimin. Personifikim i këtyre gazetarëve është motra e Arditës, Azra, e cila për t’u ngritur në karrierë dhe për të fituar para bashkëpunon me kriminelin, duke ia reklamuar vrasjet makabre të tij në gazetë.

Pak fjalë për "Vrasjet dhe Makiazhet, njësia speciale e krimeve"
Merita Bajraktari McCormak

"VRASJET DHE MAKIJAZHET", i autores Teuta Shabani Towler është nje roman i ri, te cilin kam pak jave qe e kam lexuar.
Autorja trajton nje ngjarje teper interesante dhe te veçante,ne rrethana teper te veçanta.Nje ngjarje qe ne Amerike eshte e njohur dhe plage shoqerore , Zj.Shabani Towler e ka vendosur ne Kosove. Kjo e ben me intriguese ngjrjen , pasi ne fakt ne Kosove s'ka raste te vrasjeve seriale, por kane ndodhur disa vrasje ndaj femrave. Pra ndersa eshte fjala per nje vrases serial qe vret femra kosovare,per aresye te nje semundje patologjike dhe humbet gjurmet, ne Kosove nuk është e panjohur dhimbja e humbjes.Kjo shton dhe interesin mbase epr t epare se si veprohet ne raste te tilla kur vritet nje femer,pavaresisht nga motivi.Kjo si fillim.
Metej, lexuesit i jepet kjo tablo e plote dhe veprimet policore, si te asaj nderkombetare ashtu dhe asaj lokale, dhe realiteti i ri i panjohur, i ketij fenomeni,vrasjeve seriale pra, e shton akoma me shume kersherine e lexuesit , qe nderkohe eshte familjar me historite e vrasjeve te femrave ne Kosove, shkaku i vertete i vrasjeve ne rastin konret eshte tjeter, aspak perkates me situaten e atjeshme.
Menyra se si e trajton nje semundje patologjike, psikologjine dhe efektet e psikologjise se traumatizuar ne jeten e personazhit kryesor dhe ne jeten e atyre qe jane rreth tij ,apo edhe me gjere, pra jeten e nje vrasesi serial te ngjeth..menyra se si e analizon dhe e zgjidh eshte po ashtu sa tragjike aq edhe reale dhe teper ndjesore dhe do shtoja artistikisht e realizuar.
Fantazia e Teutes shkon shume larg , ajo ravijezon momente ,krijon situata dhe sjell detaje befasuese ne shtjellimin e ngjarjeve. Teuta me mjeshteri perjashton faktin e motivit te vrasjes ne paraqitjen e personazheve policore per te ndertuar nje strukture te gjere dhe te nderthurrur letrare. Ajo le lexuesin ne ankthin e asaj qe çfare do kete ne faqen tjeter te romanit, duke pritur se kur do e gjeje oficeri i Policise Nderkombetare faktin nderkohe qe eshte para syve,para se nje femer tjeter te dhunohet e vritet.....
.. Me nje pene per t’u admiruar , Teuta na sjell nga afer realitetin Kosovar te viteve te fundit. Tragjedia, nenvleftesimi,korrupsioni, injoranca profesionale,xhelozia ne shoqeri ,apo me keq akoma ne familje, dhimbja nga tragjedia, forca e deshira per te mbijetuar,mundimet,vuajtjet per t’u integruar,-fenomene qe shoqerojne çdo shoqeri ne tranzicion apo pas nje lufte, por nga ana tjeter ne roman nuk mungojne trajtimi i virtyteve te mira shqiptare si bashkepunimi e mirekuptimi komunitar, perparimi femeror, kembengulja dhe zgjuaresia e njerezve kosovare,mikpritja ndaj te huajve,respekti dhe mbi te gjitha dashuria njerezore,virtyt i larte i kombit tone. Teuta trajton me detaje jo vetem funksionimin e Policise Nderkombetare dhe lokale,por edhe perceptimin e Policise Nderkombetare ne Kosove nga popullsia lokale.
Mendoj se integrimi nderkarakterial ne liber eshte i plote,dhe duket qarte se autorja ka pervoje te pasur si jetesore dhe po ashtu ne shkrime. Megjithese ky eshte romani i saj i pare, i pari dhe ne kete fushe te krimit te vrasjeve seriale, ne imagjinaten e saj krijuese rrjedh ne menyre fluide dhe nuk nderpritet askund ,jeta, veprimi dhe ngjarja. Faktet rreshtohen ne menyre selektive dhe duken teper reale, keshtu lexuesi jo vetem qe ndjek me interes ngjarjen,por edhe integrohet ne imagjinate duke shpresuar strategjine e mundshme te zgjidhjes jo vetem te konfliktit kryesor por edhe te "mini" konflikteve te tjera ne liber,qe jane te lidhura direkt ose indirekt me ngjarjen kryesore ,pjelle e fantazise, pra vrasjet seriale te femrave ne Kosove. Megjithese ngjarjet jane konfuze, menyra se si autorja ka ndertuar zhvillimin e tyre, per Policine natyrisht eshte i komplikuar,por per lexuesin eshte nje reflektim i balancuar i ngjarjeve,dhe ndjej se lexuesi pasi familjarizohet me karakteret, mendon se i ka te qarta pozicionet dhe levizjet e karaktereve, per shkak, pra, te nje loje shahu te komplikuar, qe autorja ja ka veshur me shume kompetence karaktereve, por shpesh detaje te vogla apo situata te papritura bejen qe ngjarja te behet me e nderlikuar.Libri eshte shkruar me nje fjalor te pasur gjuhesor dhe dialektik dhe karakterizohet nga nje vlere artistike e arrire si dhe jo vetem nga nje note e forte e realitetit te sotem, por edhe nga nje note femerore elegante ne pershkrime si edhe nga dhe nje analize psikoartistike unike.
Duke uruar autoren per Librin dhe rrugen e saj si shkrimtare, deshiroj t’ju bej te ditur se Libri i saj gjendet per shitje ne Librarite e Kosoves, ne website-n e saj personal www.teutashabanitowler.com dhe në vitrinen e librit www.libri24.com